Ministri i Mbrojtjes i Shqipërisë, Ermal Nufi, ka deklaruar se Shqipëria ndihet e sigurt pavarësisht kërcënimeve të mundshme, përfshirë edhe ato nga presidenti i Serbisë, Aleksandar Vuçiq.

Ai theksoi se politika e sigurisë së Shqipërisë është në përputhje të plotë me aleancën ku bën pjesë, NATO-n, duke shtuar se Serbia, nga ana e saj, i menaxhon rreziqet sipas strategjive të veta.

Ai gjithashtu ka theksuar se siguria e Kosovës mbetet e garantuar nga prania e forcës së mandatuar KFOR.

“E gjithë doktrina dhe përgatitja është në përputhje me NATO-n dhe siguria e qytetarëve shqiptarë, por edhe e Kosovës, për sa kohë kemi atje një forcë të mandatuar si KFOR, është e garantuar gjithashtu nga aleanca ushtarake më e fortë në botë”.

Ministri ka potencuar se shqetësimet për sigurinë e Shqipërisë trajtohen gjithmonë në koordinim me aleancën dhe partnerët ndërkombëtarë.