Ministria e Ekonomisë ka njoftuar se ka arritur t’i riparojë defektet në Bllokun 2 e pas rikthimit në funksionim, ai është duke i prodhuar rreth 260 MWh. Përveç këtij Blloku Korporata Energjetike e Kosovës e ka sanuar edhe rrjedhjen e ujit në njësinë A3 e cila ka kapacitet të prodhojë rreth 130 MWh.
Në Komunikatën e Ministrisë kanë thënë se rreth 800 MWh i prodhojnë katër blloqet e KEK-ut, A3, A4, B1 dhe B2.
“Ministria e Ekonomisë është duke monitoruar situatën e remontit dhe sanimit të blloqeve të Kosovës A dhe Kosovës B nga ana e KEK-ut, për t’u siguruar që këto blloqe do të përmirësojnë sigurinë e furnizimit gjatë dimrit”.
Ministria e Ekonomisë ka përfunduar duke iu bërë thirrje qytetarëve dhe bizneseve të vendit që të kursejnë energjinë elektrike, sepse Kosova dhe e gjithë Evropa është duke u përballur me krizë energjetike.