Zëdhënësi i Ministrisë së Jashtme të Iranit, Esmail Baghaei, ka deklaruar se çdo negociatë e mundshme duhet të zhvillohet në “mirëbesim”.
Në një postim në rrjetin X, ku iu referua Gjykatës Ndërkombëtare të Drejtësisë (ICJ), ai tha se koncepti i negociatave nënkupton një përpjekje të sinqertë për dialog me qëllim zgjidhjen e mosmarrëveshjeve.
Sipas tij, negociatat duhet të bazohen në “mirëbesim” dhe nuk mund të jenë “përplasje, diktim, mashtrim, shantazh apo detyrim”.
Ai nuk përmendi drejtpërdrejt Shtetet e Bashkuara të Amerikës, por deklarata vjen në një kohë kur po diskutohet një propozim amerikan për përfundimin e konfliktit.
Ndërkohë, Baghaei ka bërë të ditur më herët se Irani ka ndarë qëndrimet e tij përmes ndërmjetësuesve nga Pakistani lidhur me propozimin amerikan për paqe.