Për më shumë se dy dekada, që nga paslufta, një pjesë e këtij objekti në qendër të Prishtinës, u përdor për seli të Aleancës për Ardhmërinë e Kosovës.
Por, këtë të hënë Ministria e Bujqësisë e ka shkëputur kontratën e qiradhënies me partinë opozitare, që sipas ministrit ishte e pakuptimtë shfrytëzimi i saj prej AAK-së kur vet institucioni që ia udhëheq, paguan qira.
“Varësisht prej dispozitave edhe siç është e paraparë në një periudhë tranzitore, për një periudhë të shkurtër kohore i gjithë objekti do të jetë në shfrytëzim për Ministrinë e Bujqësisë, për titullarin e institucionit. Edhe mua me vjen keq realisht prej periudhës së pasluftës objekti i Ministrisë së Bujqësisë nuk është shfrytëzuar nga titullari i institucionit dhe në anën tjetër ne përballemi me një qira shumë të lartë aktualisht në objektin që e ushtrojmë veprimtarinë tonë”, tha Faton Peci-Ministri i Bujqësisë, Pylltarisë dhe Zhvillimit Rural.
Kryetari i partisë opozitare, Ramush Haradinaj e konfirmoi se sipas afateve ligjore kontraktuale, ata do ta lirojnë objektin, pas kërkesës nga Ministria.
“Pas kërkesës së palës kontraktuese për shkëputjen e njëanshme të kontratës për shfrytëzimin me qera të hapësirave prej 569 m2, me çmim mujor prej 4552 eurosh në muaj nga Aleanca për Ardhmërinë e Kosovës, njoftoj opinionin publik se edhe ne si palë kontraktuese konfirmojmë shkëputjen e kontratës nga cilësia e qiramarrësit në afatin e paraparë ligjor. E falënderojmë qiradhënësin për bashkëpunimin e deritashëm”, thotë Haradinaj.
Diskutimi për këtë objekt ka nisur tash e disa muaj, sepse sipas ministrit P eci, ai ishte në mesin e disa objekteve që ishin pronë e Ministrisë por që ishin dhënë në shfrytëzim, që sipas tij ishte joligjore.