Ministrja e jashtme e Shqipërisë, Olta Xhaçka, ka thënë se bota duhet të dëgjojë të vërtetën e agresionit të paligjshëm të Rusisë ndaj një vendi të pafajshëm.
Kështu, është shprehur ajo në takimin e llogaridhënies për krimet që po kryhen në Ukrainë.
Gjatë falënderimit ndaj njerëzve të pranishëm në mbledhje, Xhaçka është shprehur se e gjithë bota duhet të dëgjojë për krimet e bëra në Ukrainë.
Gjithashtu, ajo është shprehur se autorët e kësaj ngjarje duhet të marrin përsipër të gjitha dëmet e kryera, dhe se “Të gjithë duhet të jemi dakord për rëndësinë e sigurimit që kushdo që është përgjegjës për mizoritë në Ukrainë të kaloj në duar të ligjit”.
Xhaçka në fjalimin e saj në OKB, ka shtuar se anëtarësimi i përhershëm i Rusisë në Këshillin e Sigurimit të OKB-së, nuk mund të ofrojë imunitet për krimet e luftës.
“Fuqia e vetos, nuk mund të abuzohet për të rrafshuar qytete të tëra dhe për të vrarë mijëra burra, gra dhe fëmijë të pafajshëm pa u ndëshkuar”, ka shtuar Xhaçka.
“Unë vi nga Ballkani Perëndimor. Skenat e gjakderdhjes dhe shkatërrimit që ne shohim në pamjet që vijnë nga Ukraina, godasin shumë më ndryshe dikënd, për të cilin lufta dhe krimet e luftës nuk janë gjëra për të cilat lexoni në librat e historisë, por kujtime nga disa dekada më parë”, ka theksuar Xhaçka.