Ministria e Drejtësisë ka bërë të ditur se ministrja Albulena Haxhiu këtë të premte e ka mbledhur Grupin Punues për Veting.
Takimi është mbajtur në ambientet e Ministrisë së Drejtësisë, për hartimin dhe finalizimin e projektligjeve për realizimin e procesit të Vetingut në Sistemin e Drejtësisë si dhe ofrimin e mbështetjes për Komisionin Ad hoc të Kuvendit për Zhvillimin e Procesit të Vlerësimit Kalimtar.
Në njoftim thuhet se Haxhiu ka theksuar rëndësinë për bashkëpunim dhe kontribut profesional në procesin e vetingut.
“Mes të tjerash, ministrja Haxhiu edhe një herë ritheksoi rëndësinë e bashkëpunimit dhe kontributit profesional të të gjithë akterëve në këtë proces, atyre vendorë dhe ndërkombëtarë dhe njëkohësisht shprehu keqardhjen për mungesën e akterëve të Sistemit të Drejtësisë në një takim kaq të rëndësishëm për vetë sistemin e Drejtësisë”, thuhet në njoftimin e MD-së.
Përfaqësues të shoqërisë civile dhe partnerë ndërkombëtarë, sipas MD-së, ritheksuan rëndësinë e procesit, zhvillimit të tij në përputhje me rekomandimet e Komisionit të Venecias dhe gjithashtu ofruan mbështetjen e tyre në zhvillimin dhe përmbylljen e këtij procesi.