Ministrja e Arsimit, Shkencës, Teknologjisë dhe Inovacionit(MAShTI), Arbërie Nagavci, është takuar me ministren e Arsimit të Shqipërisë, Ogerta Manastirliu, me të cilën, siç tha ajo, kanë biseduar për vijimin e bashkëpunimit me intensitet të shtuar.
Kalendari i përbashkët, bashkëpunimi në fushën e arsimit të lartë, por edhe avancimi i performancës në arsim në të dyja vendet, ishin vetëm disa nga pikat e diskutimit.
“Diskutuam për aktivitetet e përbashkëta për Gjuhën Shqipe, kalendarin e përbashkët të punës në kuadër të Vitit të Gjuhës Shqipe, bashkëpunimin në fushën e arsimit të lartë dhe kërkimit shkencor si dhe shumë projekte tjera për përmirësimin e rezultateve të nxënësve tanë dhe avancimin e performancës në arsim në dy vendet tona”, ka shkruar Nagavci në Facebook.