Ministria e Industrisë, Ndërmarrësisë, Tregtisë dhe Inovacionit (MINTI), ka shqiptuar gjoba ndaj KEDS-it pas konstatimeve se disa njehsorë elektrikë janë përdorur me afat të skaduar të verifikimit.
Sipas MINTI-t, pas ankesave të pranuara nga qytetarët, janë intensifikuar kontrollet në terren përmes Komisionit Verifikues për njehsorët elektrikë. Gjatë verifikimeve të kryera në laboratorin e Agjencisë së Metrologjisë është konstatuar se nga KEDS nuk është respektuar afati i vlefshmërisë së disa njehsorëve elektrikë.
Në bazë të këtyre gjetjeve, Inspektorati Qendror i Mbikëqyrjes së Tregut, duke u mbështetur në Ligjin për Metrologji, ka shqiptuar gjoba në vlerë prej 1,500 deri në 5,000 euro për secilin njehsor me afat të skaduar të verifikimit.
MINTI ka theksuar se mbetet e përkushtuar në mbrojtjen e të drejtave të konsumatorëve dhe trajtimin me prioritet të ankesave të qytetarëve.
Po ashtu, ministria ka bërë të ditur se është funksionalizuar një numër mobil për pranimin e ankesave, përmes të cilit qytetarët mund të raportojnë parregullsi në çdo kohë, përfshirë vikendet dhe festat, edhe përmes platformës Viber.