Kombëtarja e Kosovës pritet që gjatë muajit qershor të zhvillojë të paktën dy miqësore, në kuadër të dative të lira të FIFA-s.
Deri më tani, Federata e Futbollit e Kosovës nuk ka bërë të ditur emrat e kundërshtarëve, të cilat zhvillohen në prag të Kampionatit Botëror që këtë verë mbahet në SHBA, Meksikë dhe Kanada.
Megjithatë, sipas raportimeve nga mediat polake, një nga kundërshtarët e mundshëm të Kosovës mund të jetë Polonia.
Kombëtarja polake tashmë e ka të konfirmuar një ndeshje miqësore ndaj Nigerisë më 3 qershor.
Ndërsa pak ditë më vonë mund të përballet edhe me Kosovën.
Ende nuk ka konfirmim zyrtar nga federatat përkatëse, por gjasat për realizimin e këtij takimi mbeten të mëdha.
Nëse kjo ndeshje konkretizohet, ajo pritet të zhvillohet në njërin nga qytetet polake si Varshava, Gdansk, Wroclaw apo Poznan.
Një përballje e tillë do të ishte historike, pasi do të shënonte ndeshjen e parë ndërmjet Kosovës dhe Polonisë.
Ndërkohë, të dyja kombëtaret vijnë pas disfatave në finalet e “play-off”-it për kualifikim në Botërorin 2026.
Kosova u mposht nga Turqia, ndërsa Polonia u ndal nga Suedia.