Komisioni për Çështje të Sigurisë dhe Mbrojtjes miratoi unanimisht Planin e Performancës së Agjencisë për Informim dhe Privatësi (AIP) për vitin 2025.
Gjatë mbledhjes, u diskutua gjithashtu mundësia e mbylljes së rrjeteve sociale, si TikTok-u, të cilat konsiderohen të rrezikshme.
Kryetarja e AIP-së, Krenare Sogojeva-Dermaku, prezantoi objektivat kryesore të Agjencisë për vitin 2025, të cilat përfshijnë avancimin e mekanizmave për mbrojtjen e të dhënave personale, rritjen e numrit të inspektimeve, dhe forcimin e transparencës institucionale.
Për më tepër, ajo theksoi synimin për përmbushjen e detyrimeve nga Konventa 108 e Këshillit të Evropës dhe ngritjen e kapaciteteve profesionale të stafit të Agjencisë.
“Avancimi i mekanizmave për mbrojtjen e të dhënave personale përmes inspektimeve dhe ngritjes s kapaciteteve dhe ekspertizës së Agjencisë dhe të institucioneve publike dhe private, rritja e numrit të inspektimeve, plotësimi i kornizës ligjore të mbrojtjes se të dhënave personale për institucionet e ligj zbatuese dhe përmbushja e obligimeve gë dalin nga Konventa 108 e Këshillit të Evropës për përpunimin automatik të të dhënave personale, ngritja e kapaciteteve profesionale të stafit të Agjencisë në fushat e inspektimit kontrollit dhe mbështetjen e institucioneve publike për rritjen e ndërgjegjësimit të zbatimit të ligjit. Forcimi i transparencës dhe llogaridhënies dhe zbatimi i programit të transparencës për publikimin pro-aktiv të informatave dhe dokumenteve nga Institucionet Publike dhe shqyrtimin e ankesave, zhvillimi i Programit të transparencës së Institucioneve Publike që siguron të dhënat e hapura dhe publikimi pro aktiv të dokumenteve publike, realizimi i së drejtës për qasje në dokumente publike përmes shqyrtimit të ankesave të pranuara nga subjektet dhe Monitorimin e institucioneve publike në zbatimin e ligjit”, u shpreh Sogojeva-Dermaku.
Gjatë diskutimit, deputeti i Lëvizjes Vetëvendosje, Dimal Basha, pyeti kryetaren e AIP-së lidhur me ankesat e qytetarëve për faturat e KESCO-s që dërgohen pa zarfe.
Sogojeva-Dermaku bëri të ditur se AIP ka vendosur dy gjoba për këtë shkelje, një ndaj KESCO-s dhe një ndaj KRU “Prishtina”, dhe shtoi se monitorimi i ndërmarrjeve vazhdon pavarësisht mungesës së ankesave të tjera.
“Është e vërtetë që e kemi gjobitur KESCO-n dhe KRU ‘Prishtina’ lidhur me këtë shkelje dhe më nuk kemi asnjë ankesë. Pasi që nuk kemi ankesa, nuk do të thotë që ne nuk i inspektojmë këto ndërmarrje”, deklaroi ajo.
Çështja e mbylljes së TikTok-ut u ngrit nga deputeti i PDK-së, Hisen Berisha, i cili vuri në dukje shqetësimet globale për këtë platformë dhe pyeti për kapacitetet e Kosovës për t’u mbrojtur nga ndikimet e saj. Ai gjithashtu sugjeroi ndërmarrjen e kampanjave vetëdijesuese për përdorimin e aplikacioneve të tilla.
“Nëse SHBA ndjehet e rrezikuar nga kjo platformë, atëherë ku e ka fuqinë Kosova dhe sa jemi të pajisur nga këto vërshime të këtyre aplikacioneve që konsiderohen të dëmshme dhe a kemi ndonjë kampanjë ndërgjegjësimi për qytetarë për përdorimin e këtyre aplikacioneve”, u shpreh Berisha.
Megjithatë, deputetët e Lëvizjes Vetëvendosje nuk u pajtuan me diskutimet mbi këto tema dhe lëshuan mbledhjen.