Kryetari i PSD-së, Dardan Molliqaj, ka thënë se vizita e kryeministrit Albin Kurti në veri ka qenë vetëm për simbolikë, dhe se jo që ka sjellë ndonjë gjë përmbajtësore.
Molliqaj në “Debat Plus” tha se Kurti është në prag të tërheqjes nga veriu dhe se, sipas tij, për këtë arsye edhe tenton që përmes simbolikave të japë mesazh te qytetarët se nuk do lëshojë pe.
“Është pjesë thelbësore e pushteteve populliste që duke lëshu pe me bë sa më shumë simbolika. Simbolika në politikë është e rëndësishme, tash po keqpërdoret, por ka rol në komunikimin me qytetarët. Vetë fakti që ka shku në Leposaviq, është fakti që ngadaldale kanë me u tërhekë në kuptimin e masave të dhunshme që kanë qenë, kam qenë kundër kësaj, rezultati ka dalë i keq për Kosovën, sanskione, drafte më të këqija, autonomi. Problemi i veriut është më shumë politik se i ligjit…”, tha ai.
Tutje, ai theksoi se nën qeverisjen e Kurtit, në veri nuk ka ndërruar asgjë, duke shtuar se qytetarët serbë të Kosovës vazhdojnë edhe më shumë ta përkrahin partinë e Aleksandër Vuçiqit.
“Ka shkuar për simbolikën, tash do të tërhiqet nga veriu, dhe do të instalohet autonomia në veri, dashti ta bëjë një simbolikë kinse ka ndërru gjendja në veri. Për ata që e marrin vesh politikën, nuk ka ndërru asgjë. Përkundrazi, numri i serbëve që kanë qenë kritikë ndaj Vuçiqit apo Listës Serbe është zvogëlu apo është zhdukë fare. Në zgjedhjet e vitit 2022 dhe 2023, 10% më shumë ka marrë vota partia e Vuciqit se sa më parë, tash janë rritë, zërat kritikë janë shuar, dhe janë bërë kompakt si popullsi dhe përfaqësues kundër Qeverisë së Kosovës”, tha ai.
Sipas tij, kryeministri Kurti do ta lejojë themelimin e Asociacionit të Komunave me Shumicë Serbe.