Kryetari i Partisë Socialdemokrate (PSD), Dardan Molliqaj, ka thënë se kryeministri i Kosovës, Albin Kurti, me pranimin e planit franko-gjerman “po e tradhton Republikën e Kosovës”.
“E me pranimin e këtij plani, Albin Kurti po e tradhton Republikën e shoqërinë tonë.
Ai me fajin e tij e solli veten para dy opsioneve të vetme të mundshme: dorëheqjes ose tradhtisë. E para është mundësi për shtetin e shoqërinë. E dyta ështe degradim e rrënim i Republikës”, ka shkruar Molliqaj në Facebook.
I pari i PSD-së ka thënë se plani franko-gjerman është normalizim i mosnjohjes nga Serbia, dhe se ky plan, sipas tij, e kontrabandon Asociacionin dhe negociatat i bën proces të pafund.
“ASOCIACIONI, TRADHTI NDAJ REPUBLIKËS. Nuk ka edhe Republikë edhe Asociacion. Prandaj, nuk mund edhe ta duash Republikën edhe ta pranosh Asociacionin. Plani franko/gjerman është normalizim i mosnjohjes nga Serbia. Plani franko-gjerman është normalizim i mosnjohjes nga Serbia dhe ky plan e kontrabandon Asociacionin dhe negociatat i bën proces të pafund”, ka vijuar Molliqaj.
Ndryshe, të hënën e 27 shkurtit, kryeministri Kurti do të takohet me presidentin e Serbisë, Aleksandër Vuçiq, ku temë diskutimi i këtij takimi do të jetë propozimi i BE-së në kuadër të dialogut Kosovë-Serbi.