Ministria e Punëve të Jashtme dhe Diasporës (MPJD) ka njoftuar se autoritetet gjyqësore të Serbisë kanë iniciuar procedurë penale ndaj shtetasit të Kosovës, Dukagjin Maxhuni, të cilit i është caktuar masa e paraburgimit prej 30 ditësh nën pretendimet për krime lufte të vitit 1999.
Sipas MPJD-së, Zyra Ndërlidhëse e Kosovës në Serbi ka njoftuar menjëherë Delegacionin e Bashkimit Evropian në Serbi, ndërsa u është dërguar notë verbale edhe misioneve diplomatike të vendeve të Quint-it të akredituara në Serbi.
Ministria thotë se këto veprime janë ndërmarrë me qëllim të angazhimit të partnerëve ndërkombëtarë për mbrojtjen e të drejtave dhe sigurisë së shtetasit të Kosovës.
Ambasadori i Kosovës në Serbi, Jetish Jashari, është në kontakt të vazhdueshëm me familjen e Maxhunit, ndërsa përmes Zyrës Ndërlidhëse do të paraqitet kërkesa zyrtare për lejimin e vizitës tek i arrestuari.
Vizita pritet të realizohet gjatë javës së ardhshme.
MPJD ka bërë të ditur se do të vazhdojë monitorimin e rastit dhe ndërmarrjen e veprimeve diplomatike për mbrojtjen e të drejtave të Maxhunit.