Gjatë ditës së enjte, në disa media ka pasur raportime se një zyrtar i Ministrisë së Punëve të Brendshme të Kosovës është arrestuar në kufi me Serbinë.
Gjithmonë sipas këtyre raportimeve, atij dyshohet se i janë gjetur rreth 18 kilogramë drogë të tipit marihuanë.
Në një përgjigje për Dukagjinin, Ministria e Punëve të Jashtme dhe Diasporës (MPJD) ka thënë se deri më tani nuk ka ndonjë konfirmim zyrtar për arrestimin e tij.
“Zyra Ndërlidhëse e Republikës së Kosovës në Serbi nuk është informuar dhe as nuk ka arritur ende të konfirmojë zyrtarisht arrestimin sipas raportimeve, të cilave i referoheni”, thuhet në përgjigjen e MPJD-së.
Sipas MPJD-së, Zyra Ndërlidhëse e Kosovës në Serbi ka kërkuar nga Qeveria e Serbisë ta konfirmojë arrestimin eventual dhe t’i japë sqarimet se pse ka ndodhur një gjë e tillë.
Po ashtu, është kërkuar të dihet edhe vendi apo qendra e paraburgimit ku dyshohet se po mbahet zyrtari i MPB-së.
“Si edhe në rastet e mëhershme, Zyra Ndërlidhëse e Republikës së Kosovës në Beograd nëpërmjet ambasadorit Jashari i ka dërguar shkresë zyrtare Zyrës Ndërlidhëse të Serbisë në Kosovë përmes së cilës ka kërkuar nga Qeveria e Serbisë që ta konfirmojë arrestimin eventual, të ofrojë sqarime për arsyet e arrestimit dhe të bëjë të ditur vendin (qendrën e paraburgimit), ku është duke u mbajtur shtetasi i Republikës së Kosovës”, thuhet në përgjigjen e MPJD-së.
MPJD ka theksuar se do ta mbajë të informuar publikun sapo të pranojë informata të reja.