Analisti politik, Artan Muhaxhiri, është shprehur optimist se së shpejti mund të liberalizohen vizat për qytetarët e Kosovës.
Muhaxhiri, në emisionin Magazina me Blerina Neziri – Abazi dhe Lirik Sylmetaj, ka thënë se një nga arsyet e liberalizimit të vizave për Kosovën, mund të jetë kërkesa për punëtorë nga shteti i Gjermanisë.
Sipas tij, mërgata kosovare në Gjermani, ka krijuar imazh të mirë në sytë e e shtetit gjerman.
“BE-ja, është një institucion i çuditshëm ndonjëherë di të befasojë për mirë, ndonjëherë për të keq, por mendoj se kësaj here do të ndodhë diçka konkrete sepse i erdhi fundi. Presionet janë të mëdha, por është edhe një kërkesë tjetër, Gjermania ka një kërkesë të madhe për fuqi punëtore dhe kosovarët kanë imazh të mirë si punëtorë, ka me dekada që ekziston mërgata jonë atje, në shumicën e rasteve ka pasur imazh pozitiv, për këtë shkak ekziston një interes i Gjermanisë që të marrë një fuqi punëtore nga Kosova”, ka thënë ai.
Muhaxhiri ka theksuar se në Gjermani po kërkohet lehtësimi i kritereve për punësim, për qytetarët e Kosovës.
“Ka pasur deklarata edhe të politikanëve gjermanë që t’i lehtësojnë edhe kriteret për punësim, sidomos për kosovarët në Gjermani, do të na përputhen interesat. Kësaj radhe kemi bazë të fortë sa i përket çështjes së vizave”, është shprehur Muhaxhiri.
Muhaxhiri ka potencuar se Këshilli i Ministrave e merr vendimin final për liberalizim apo jo të vizave për Kosovën.
Ai bëri të ditur se edhe nëse Kosova e merr dritën e gjelbër për liberalizim të vizave, duhet të pritet rreth gjashtë muaj të tjerë derisa të plotësohen kriteret burokratike.