Ministria e Bujqësisë ka njoftuar se është nënshkruar Udhëzimi Administrativ për Pagesat Direkte – Subvencionet 2026, përmes të cilit i hapet rrugë nisjes së thirrjeve për mbështetjen financiare të fermerëve në gjithë vendin.

Sipas këtij vendimi, Agjencia për Zhvillimin e Bujqësisë obligohet të hapë thirrjen për aplikim, ndërsa pagesat do të realizohen pas verifikimit të aplikimeve dhe në përputhje me afatet e përcaktuara në udhëzim.

Ministri i Bujqësisë, Armend Muja, ka bërë të ditur se paketa e re e subvencioneve për vitin 2026 sjell rritje të mbështetjes në disa sektorë kyç të bujqësisë, me synim forcimin e prodhimit vendor dhe rritjen e konkurrueshmërisë.

“Sot kam nënshkruar Udhëzimin Administrativ për Pagesat Direkte – Subvencionet 2026, përmes të cilit obligohet Agjencia për Zhvillimin e Bujqësisë të hapë thirrjen për mbështetjen e fermerëve të Kosovës. Pagesat do të realizohen shpejtë, pas verifikimit, sipas afateve të përcaktuara në Udhëzimin Administrativ.

Risitë kryesore të mbështetjes për vitin 2026 janë:
✅ 30% rritje për sipërfaqet e mbjella me perime në fushë të hapur dhe në serra
✅ 30% rritje për sipërfaqet e mbjella me pemë
✅ 20% rritje për pagesat e grurit me rendiment të lartë
✅ 20% rritje për sipërfaqet e mbjella me mjedra
✅ 20% rritje për sipërfaqet e mbjella me patate dhe fasule
✅ 20% rritje për mbështetjen e mëshqerrave për riprodhim
✅ 20% rritje për mbështetjen e viçave për majmëri
✅ 10% rritje për sipërfaqet e mbjella me vreshta
✅ 7 cent për litër subvencion për qumështin
✅ 100 euro shtesë për secilin fermer që kultivon hektarin e parë
✅ 100 euro për hektar mbështetje për plehun artificial
✅ 54 euro për hektar mbështetje për naftën
✅ 500 euro mbështetje për të rinjtë dhe të rejat (18–29 vjeç) që regjistrohen për herë të parë në skemat e pagesave direkte.
Të gjitha kulturat tjera mbeten sipas vitit të kaluar.
Me këtë paketë, po rrisim mbështetjen për prodhimin vendor, po fuqizojmë fermerin aktiv dhe po e bëjmë bujqësinë më të qëndrueshme e më konkurruese.
Një risi e rëndësishme është se ky Udhëzim Administrativ, për dallim nga praktikat e deritanishme, është konceptuar si një kornizë afatgjatë sipas praktikave të BE-së. Qëllimi është që në vitet në vijim thirrjet për aplikim të hapen me kohë dhe të jenë të harmonizuara me kalendarin e punëve bujqësore, duke u mundësuar fermerëve planifikim më të mirë të prodhimit dhe investimeve të tyre”, ka njoftuar Muja.