Ministri i Bujqësisë, Pylltarisë dhe Zhvillimit Rural, Armend Muja, ka marrë vendim për vendosjen e një sistemi të detyrueshëm të raportimit digjital në sektorin e qumështit, me qëllim forcimin e sigurisë ushqimore dhe rritjen e transparencës në treg.
Sipas komunikatës për media, vendimi është marrë në mbështetje të Ligjit për Ushqim dhe kompetencave institucionale për garantimin e sigurisë ushqimore, transparencës dhe gjurmueshmërisë së produkteve në treg.
“Ministri Muja merr vendim për forcimin e sigurisë ushqimore në sektorin e qumështit
Në mbështetje të Ligjit për Ushqim dhe kompetencave për garantimin e sigurisë ushqimore, transparencës dhe gjurmueshmërisë në treg, kam nxjerrë Vendimin për sistemin e detyrueshëm të raportimit digjital në sektorin e qumështit.
Përmes këtij vendimi, qumështoret, pikat grumbulluese, përpunuesit dhe importuesit do të obligohen të raportojnë në mënyrë digjitale të dhëna mbi grumbullimin, prodhimin, stoqet, importet, si dhe përdorimin e qumështit pluhur dhe yndyrave bimore në produktet ushqimore.
Sistemi do të forcojë transparencën në treg, gjurmueshmërinë e produkteve ushqimore dhe bashkëpunimin institucional ndërmjet MBPZHR-së, AUV-it, Doganës dhe institucioneve tjera relevante.
Ky është një hap i rëndësishëm në mbrojtje të konsumatorit, fermerëve vendorë dhe zhvillimit të një tregu më transparent, më të drejtë dhe më të kontrolluar në sektorin e qumështit në Republikën e Kosovës”, thuhet në njoftim.