Kryeshefi ekzekutiv i Bordit të Ndërmarrjes Hidroekonomike “Ibër-Lepenci”, Faruk Mujka, ka bërë të ditur se rritja e papritur e nivelit të ujit në lumin Ibër ka shkaktuar dëme tek punishtja e urës së re te “Tre Rrokaqiejt” në Mitrovicë.
Mujka, mes tjerash, bën të ditur se nuk bëhet fjalë për dëme të shkaktuara nga dora e njeriut teksa shton se niveli i ujit është stabilizuar dhe punimet për sanimin në kanalin kryesor për kontrollin e niveli të ujit do të nisin qysh sot, njofton Dukagjini.
“Mbrëmë kemi pasur një rritje të papritur të nivelit të ujit në lumin Ibër e që ka shkaktuar dëme materiale në punishten e urës së re që po ndërtohet te tre rrokaqiejt në Mitrovicë. Shkak i kësaj ngritjeje të nivelit është sasia e madhe e ujit në digën e Pridvoricës për shkak të rreshjeve të shumta ditëve të fundit në rrjedhën e epërme të lumit si dhe të rrëshqitjes së kanalit te Zubin Potoku dhe nevojës emergjente që uji i tepërt nga kanali të bartet në lumë”.
“Kemi ardhur në situatë të kalkulojmë dëmin më të vogël edhep se edhe kjo e krijuar nuk është për tu nënçmuar. Me rëndësi është se konstruksioni i urës nuk është rrezikuar asnjëherë. Duhet të sqarohet se nuk është dorë njeriu që ka kriju dëmin por dora e njeriut e ka minimalizuar dëmin e mundshëm shumë më të madh e afatgjatë. Aty në punishte për shkak të punimeve është krijuar një fyt i ngushtë i cili nuk ka mundur ta përcjellë nivelin e ardhur. Niveli është stabilizuar brenda një ore dhe sot vazhdojmë me sanimin në kanalin kryesorë duke tentuar që niveli ujit të jetë sa më i kontrolluar”, ka shkruar Mujka.