Deputetja e Lëvizjes Vetëvendosje, Fatmire Mulhaxha-Kollçaku, u ka bërë thirrje deputetëve për mbështetje të kandidates Feride Rushiti për presidente, duke kërkuar që procesi të përmbyllet për të zgjidhur krizën institucionale.
Ajo u ka bërë apel të gjithë deputetëve, pozitë dhe opozitë, që të votojnë për Rushitin në seancën e Kuvendit.
“I ftoj të gjithë kolegët deputetë, pozitë e opozitë, sot ta mbështesim Feride Rushitin t’i japim zgjidhje kësaj krize institucionale”, ka deklaruar ajo.
Mulhaxha-Kollçaku ka theksuar se Lëvizja Vetëvendosje, sipas saj, nuk lufton për pushtet apo për të marrë të gjitha pozitat shtetërore.
Ajo shtoi se posti i presidentit duhet të mbetet jashtë ndikimeve partiake edhe në të ardhmen.