Në Komunë erdhi për t’i dorëzuar formularët, por Fahri Aliu nga komuna e Obiliqit, pati një problem. Nga 46 krerë lopë sa ka në fermën e tij, aplikimin për subvencion, Aliu i dorëzoj vetëm për 27 copë.
Mungesa e matrikullave, është bërë shkas që ai mos t’i përfshij në subvencionim 19 prej tyre.
“Lopët duhet të kenë matrikula dhe nuk i kanë, unë sot erdha edhe i pruna dokumentet për 27 lopë për tjerat jo pasi që nuk muj me apliku. Ky problem është që dy vite, nuk mujm me apliku as për mshtjerra që janë ka 14 muajsh pasi që nuk është bërë regjistrimi i tyre ende”, ka thënë Fahri Aliu, fermer nga Obiliqi.
Me problem të njëjtë në këtë komunë, janë duke u ballafaquar edhe 64 fermer të tjerë të Obiliqit.
Drejtori i Bujqësisë, thotë se dy veterinarët e kësaj komune kanë paraqitur kërkesë për furnizim më këtë material tash e dy vite në Agjencinë e Ushqimit dhe Veterinës, por që problemi nuk është zgjidhur ende.
“Ka dal një problem tjetër, disa fermer nuk kanë matrikula dhe Agjensioni i Ushqimit dhe Veterinës që dy vite nuk ka pas matrikula dhe shpresoj që do të rregullohet, ne kemi filllu prej djeshit më prit aplikacione nga fermerët, ata që kanë matrikula po ata tjertë jo”, ka deklaruar Bejtullah Mjekiqi, Drejtor i Bujqësisë dhe Zhvillimit Rural në Komunën e Obiliqit.
Shqetësimin e njëjtë sikurse të komunës së Obiliqit, e kanë edhe komunat e tjera të Kosovës.
Për ketë edhe Ministria e Bujqësisë, Pylltarisë dhe Zhvillimit Rural ka marrë vendim për zgjatjen e afatit për aplikim për pagesa direkte/subvencione për kulturat bujqësore për vitin 2024 deri më 29 prill 2024.
Por, nëse do të zgjidhet ky problem për 10 ditë të zgjatjes së këtij afati për aplikim, nuk dihet.
Nga ky dikaster, nuk kanë dhënë gjatë ditës një përgjigje për televizionin nëse do të mund të sigurohen matrikullat brenda këtij afati.
Një fermer mund të aplikojë për subvencionim vetëm nëse ka mbi 5 krerë lopë.
Shuma për një krerë, është nga 50 euro për ato mbi 14 muajsh derisa për lopë qumështore nga 90 €.