Në Komisionin për Buxhet, ministri i Financave, Hekuran Murati, të mërkurën ka raportuar për ratifikimin e marrëveshjes ndërkombëtare për “projektin e reformës së sistemit të ndihmës sociale në Kosovë”, marrëveshje e cila u përcoll me kritika nga opozita.
Murati ka thënë se kjo marrëveshje parasheh reformë të skemave sociale e pensionale dhe se kredia e rregullon këtë fushë.
Por me të nuk është pajtuar opozita, pasi deputeti i PDK-së, Ferat Shala, ka kritikuar marrëveshjen për kredi 47 milionë euroshe.
Ndërsa deputeti i LDK-së, Avdullah Hoti, ka thënë se nga kjo marrëveshje, 15 milionë euro janë për mbështetje direkte buxhetore që sipas tij janë të panevojshme, raporton KP.
“Në histori nuk ka ndodhur të merret kredi për skema sociale. Është e pakuptimtë të thuhet po marrim kredi e borxhi s’po rritet”, ka deklaruar ai.
Ministri Murati qeshi me komentet e ish-kryeministrit Hoti, gjë që nxiti reagimin e deputetit të LDK-së.
“Kërkoj të jeni serioz kur flisni me mua”, iu drejtua Hoti ministrit Murati.