Me të marrë fjalën ministri i Financave, Hekuran Murati, duke shtruar pyetje në drejtim të anëtarit të SBAShK-ut, Ymer Ymeri, për orientimin e tij politik, kanë filluar reagimet nga deputetët e partive opozitare.
“Dua të pyes për afërsitë politike të Ymer Ymerit”, ka thënë Murati.
Pas kësaj pyetje, ka reaguar deputeti i PDK-së, Ardian Kastrati, duke i thënë atij të flasë për numra dhe të mos bëjë show.
“Folna këtu për financa, ke ardhur si karramel i çerdheve, nuk kemi ardhur për të bërë show këtu”, ka thënë Kastrati.
Tutje, Murati ka thënë se nuk mund të arrihet marrëveshje nëse kërkesat e SBAShK-ut ndryshojnë vazhdimisht.
“Nuk mund të arrihet marrëveshje me ndryshime të vazhdueshme të kërkesave nga ana e Sindikatave. Normalisht, nuk mund të arrish marrëveshje kur këta qëllim e kanë mosmarrëveshjen”, ka thënë ai.
Grevat e sindikatave kanë filluar që nga data 25 gusht e këtij viti dhe janë duke vazhduar ende. Kërkesë kryesore e tyre është shtesa prej 100 eurosh, deri në miratimin e Ligjit të Pagave, i cili tashmë është në konsultim publik.
Kryeministri i Kosovës është takuar me krerët e Këshillit Grevist, por nuk kanë arritur të gjejnë kompromis në lidhje me grevat. Të dyja palët pas takimit e kishin akuzuar njëra-tjetrën për dështim të një marrëveshjeje.