Murati: Mbi 16 mijë gra lehona kanë përfituar nga 170 euro në muaj deri më tani
Mbi 16 mijë gra lehona në Kosovë kanë përfituar deri më tani nga 170 euro në muaj. Kjo në kuadër të shtesave për këtë kategori, e cila ka nisur së zbatuari nga gushti i vitit 2021. Kështu ka njoftuar ministri i Financave, Hekuran Murati, gjatë raportimi para Komisionit parlamentar për Shëndetësi dhe Mirëqenie Sociale. “16 […]
Mbi 16 mijë gra lehona në Kosovë kanë përfituar deri më tani nga 170 euro në muaj. Kjo në kuadër të shtesave për këtë kategori, e cila ka nisur së zbatuari nga gushti i vitit 2021.
Kështu ka njoftuar ministri i Financave, Hekuran Murati, gjatë raportimi para Komisionit parlamentar për Shëndetësi dhe Mirëqenie Sociale.
“16 mijë e 700 gra lehona kanë përfituar nga skema mbështetëse. Fillimisht ka qenë plani që të mbështeten vetëm nënat e papunësuara, por duke e ditur që te gratë e punësuara gjashtë muajt e parë i paguan punëdhënësi e tre muaj shteti, ne kemi dashur që të tregojmë mbështetjen edhe për tre muajt tjerë që deri më tash lehonat e punësuara nuk kanë përfituar nga shteti”, ka thënë Murati.
Ndërsa, sa i përket shtesave për fëmijë, ministri Murati ka bërë të ditur se deri më tani kanë përfituar rreth 152 mijë fëmijë.
“Fëmijët deri në 2 vjeç përfitojnë nga 20 euro në muaj, ndërkaq ata mbi 2 vjeç i përfitojnë nga 10 euro në muaj”.

Murati në komision paralajmëroi se mbështetja për fëmijët do të zgjerohet muajt e ardhshëm dhe do të përfshihen edhe mosha të tjera.
Ndërkaq, më 10 nëntor, kishte filluar ekzekutimi i pagesave për mbi dy mijë gra lehona, të cilat kanë përfituar pas aplikimit gjatë muajit tetor të vitit 2021, nga gjithsejtë mbi katër mijë përfituese.
Vendimi ishte ndërmarrë në mbledhjen e qeverisë, ku pos këtij, ishin marrë edhe një sërë vendimesh të tjera.
I njëjti, parasheh përfshirjen edhe të lehonave të punësuara, krahas atyre të papuna për mbështetje financiare që do të ofrohet nga qeveria, me qëllim të fuqizimit të mëtutjeshëm të grave në tregun e punës.
Këto mjete janë siguruar nga emetimi i “Bonove të Diasporës”, instrument financiar që e kanalizon kapitalin e diasporës drejt investimit për ndërtimi dhe zhvillimi të ekonomisë së vendit.















