Ministri i Financave, Punës dhe Transfereve, Hekuran Murati, ka bërë të ditur se rishikimi i buxhetit ka mundësuar të zgjerohen skemat shtesë për fëmijët.
Gjatë fjalimit të tij në Kuvendin e Kosovës, Murati ka thënë se tashmë ka mjete të mjaftueshme që të zgjerohet skema për shtesat e fëmijëve.
“Meqë sot kaloi edhe rishikimi buxhetit, kam kënaqësinë t’i njoftoj edhe qytetarët që për shkak të kalimit të rishikimit, tani do të kemi mundësi që prej muajt të ardhshëm të fillojmë me zgjerimin e skemës për shtesat për fëmijë. Pra, nga muaj i ardhshëm do të fillojmë zgjerimin e skemës për shtesat për fëmijë, sepse tani me hyrjen në fuqi të rishikimit, kemi edhe fonde të mjaftueshme”, është shprehur Murati.
Fëmijët e lindur pas vitit 2015 i marrin nga 10 euro në muaj, ndërkaq ata që kanë lindur në dy vitet e fundit i marrin nga 20 euro.
Në anën tjetër, sa i përket mundësisë së tërheqjes së mjeteve nga Trusti pensional, ministri Murati ka deklaruar se tashmë është dhënë qëndrimi nga qeveria.
“Si qeveri tashmë kemi dhënë vendimin tonë se pse kjo çështje nuk duhet të kalojë dhe nuk duhet të shkohet tutje, sepse shkatërrohet një institucion e me atë institucion shkatërrohet edhe e ardhmja e pensionistëve”, shtoi ai.
Sipas tij, tërheqja e kursimeve nga Trusti do të shkatërrojë sistemin pensional të Kosovës.
“Shumë vite më parë nuk kemi pasur një sistem pensional, tash që e kemi bërë një sistem pensional tonin po duam ta rrënojmë vetë”.
Ndryshe, deputeti i Partisë Demokratike të Kosovës, Bekim Haxhiu, gjatë propozimit të tij, ka theksuar se kjo iniciativë ligjore ka ardhur si domosodshëmri për shkak të situatës nëpër të cilën po kalojnë qytetarët, krizës ekonomike dhe rritjes së çmimeve.
Ai u ka bërë thirrje deputetëve, në veçanti atyre të opozitës, që të votojnë pro këtij projektligji.
“Ne deputetët pa dallim duhet ta mbështesim këtë projekltigj pa dallim partie. Kërkesa e qytetarëve duhet të na bashkojë, bashkëpunimi për të tejkaluar krizën është i domosodoshëm”, ka thënë ai.
Drejtuar deputetëve të partisë në pushtet (Lëvizjes Vetëvendosje), Haxhiu u ka bërë thirrje që të tejkalojnë kufizimet politike që sipas tij përpiqet t’ua vendosë partia.
Ai u ka kërkuar që t’i mbrojnë parimet e tyre dhe betimin e deputetit.