Vedat Muriqi ka vazhduar me formë të shkëlqyer te Fenerbahçe, duke shënuar golin e tretë radhazi për skuadrën turke.
Sulmuesi i Kosovës realizoi në minutën e tretë në fitoren 2:0 të Fenerbahçes ndaj Samsunsporit, në kuadër të xhiros së tretë të Superligës së Turqisë.
Muriqi e zhbllokoi ndeshjen me një gjuajtje të saktë nga zona, pas asistimit të Oğuz Aydınit.
Ky ishte goli i tretë radhazi për Muriqin. Ai kishte shënuar edhe ndaj Konyasporit në kampionat dhe ndaj Lyonit në ndeshjen kthyese të plejofit të Ligës së Kampionëve. Në ndeshjen ndaj Konyasporit, sulmuesi kosovar kishte regjistruar edhe një asistim.
Kështu, Muriqi në tri ndeshjet e fundit ka kontribuar me tre gola dhe një asistim.
Fenerbahçe e vulosi fitoren ndaj Samsunsporit me golin e Aydınit në minutën e 49-të.
Pas tri xhirove të para, Fenerbahçe ka grumbulluar gjashtë pikë.