Kryeministri i Kosovës, Albin Kurti, e ka akuzuar emisarin e BE-së për dialogun, Miroslav Lajcak, se është koordinuar me presidentin e Serbisë, Aleksandër Vuçiq.
Kurti tha se të dy kishin për qëllim që marrëveshja bazike në mes të Kosovës dhe Serbisë të mos zbatohej në plotni, por vetëm pjesa për Asociacionin.
“E kuptova që dokumenti i Serbisë që në titull tregonte shpërfilljen e marrëveshjes bazike, së pari zbatimi i Asociacionit dhe pastaj diskutimi për planin e BE-së, në fakt ishte shndërruar në qëndrim të Lajçakut. Si i tillë, Lajçaku dhe Vuciqi dukej se ishin koordinuar, me një qëllim të vetëm që ta bëjnë të pamundur një skenar në të cilin marrëveshja zbatohet në plotni dhe t’i japin jetë një skenari alternativ, që gjysma e marrëveshjes zbatohet, kurse pjesa tjetër të mos zbatohet”, tha ai.
Kësaj akuze të Kurtit ndaj Lajçakut, i ka reaguar analisti Imer Mushkolaj, duke thënë se “është i njëjti Lajçak, të cilin dikur Kurti e mbronte dhe e lavdonte”.
“Kosova është shtet në kontinentin e Evropës e nuk është në kufi me Meksikën. Thaçi më keq po flet për Borrellin, Lajçakun e Brukselin sesa për Daçiqin e Beogradin, Borrelli e Ljaçaku nuk kanë kryer gjenocid në Kosovë”, kishte thënë Kurti në vitin 2020.