Analisti politik, Imer Mushkolaj, ka deklaruar se me veprimet e fundit në veri, kryeministri i Kosovës, Albin Kurti, i ka befasuar ndërkombëtarët në mënyrë jo të këndshme.
Kjo, sipas tij, ka ndodhur për shkak të mungesës së koordinimit me ta.
“Kjo që e ka bërë është befasi shumë e madhe dhe jo e këndshme për aleatët. Moskoordnimi me aleatët, në kuptimin e situatës së brishtë në veri të vendit, që është paralajmëruar se mund të ndodhë se kryetarët me të drejtë provojnë me hy në ndërtesa të komunës”, ka thënë ai.
Mushkolaj ka theksuar se Kurti nuk mund ta shtrijë sovranitetin në veri të Kosovës pa aleatët ndërkombëtarë, me theks të veçantë pa ShBA-të.
“Nëse Kurti do të doja shumë që ta marrë veriun ta shtrijë sovranitetin dhe ta kemi në menaxhim të plotë, pa pasur nevojë pa ndihmën e askujt, pa ndihmën e ShBA-së e as KFOR-it do të isha i lumtur. Por, ai duhet ta ketë parasysh se ai nuk mund ta bëjë këtë pa aleatë, pa ShBA-të”, ka thënë ai.
Mushkolaj tha se beson që ditëve në vijim Kurti do të marrë veprime pozitive sa i përket kërkesave të partnerëve ndërkombëtarë.
Nëse nuk e bën këtë, sipas tij, raportet me ShBA-në do të rrezikohen edhe më shumë.
“Nëse Kurti tërhiqet, gjen kompromis me tërheqjen e policëve nga ndërtesat, jo nga gjithë qyteti. Nëse ai e tregon vullnetin me i ndërmarrë masa mbetet me pa. Do të ketë lëvizje pozitive në këtë aspekt, për shkak se besoj është i vetëdijshëm se situata mund të vijë duke u bërë serioze në raport me ShBA”, tha ai.
Ai e ka kritikuar Bashkimin Evropian për mënyrën se si ka reaguar pas dhunës së protestuesve në veri.
“BE ka qasje të padrejtë, i njëson bandat e veriut me policinë e Kosovës, flet për dy palë për dhunën që ka ndodhur”, ka thënë ai.