Analisti, Imer Mushkolaj ka thënë se Ministrja e Ekonomisë, Artane Rizvanolli i tingëllon sikurse një parashikuese e motit.
I ftuar në Debat Plus të RTV Dukagjni, Mushkolaj ka thënë se qeveritë e tjera nëpër Evropë ofrojnë subvencionim në momentin kur thonë se duhet izoluar shtëpijat.
“Ministrja e Ekonomisë më tingëllon si parashikuese e motit, për me ditë a është dimri i vështirë, hi e lypi parashikimin më të mirë në Google, cilido qoftë, më i miri në botë dhe e marrim vesh. Po na thotë se është mirë me i izolu shpijat, thua ti se nuk e dinë qytetarët e Kosovës se është mire me i izolu shtëpijat”, ka deklaruar Mushkolaj.
Ndër të tjera, ai ka theksuar se akoma nuk dihet se si planifikon Qeveria e Kosovës të kalojë dimrin e vështirë që paralajmërohet.
“Nuk e dimë si do kalohet dimri, nuk e dimë qysh do të sigurohet rryma, nuk e dimë a ka negociata qeveria me ndonjë furnizues”, ka theksuar Mushkolaj gjersa thotë se e vetmja gjë që di janë fjalët e Ministres për të izoluar shtëpijat dhe njëherit, edhe se qytetarëve po u vështirësohet jeta.
Për keqmenaxhimin e krizës energjetike është pajtuar edhe ish-kryetari i Komunës së Prishtinës, Shpend Ahmeti. Ai ka theksuar se nuk ka parë ndonjë përgatitje nga ana e kësaj të fundit për thellimin e mëtejmë të saj.