Analisti Imer Mushkolaj ka thënë se presidentja në detyrë Vjosa Osmani duhet të shkojë t’i vizitojë njerëzit nëpër shtëpia dhe të shohë se si po jetojnë.
Ai ka theksuar se ajo është edhe një lloj garantuese e kohezionit social.
“Kjo nuk e bën këtë… Në kohën kur kriza ekonomike është duke u thelluar edhe për shkak të konfliktit në Lindjen e Afërt, ku çmimet janë rritur dhe janë duke shkuar zinxhirë, zonja nuk merret me këtë punë. Me këtë nuk jam duke e amnistuar qeverinë, përkundrazi… por shkon edhe bën fushatë për fatin e saj personal. Në këtë situatë mua nuk më intereson fare cili do të jetë fati personal politik i Vjosa Osmanit…”.
Mushkolaj ka kritikuar edhe qeverinë dhe ministren e Industrisë dhe Tregtisë, Mimoza Kusari, për mosmarrjen e masave konkrete për të ndërhyrë në zvogëlimin e krizës aktuale.
“Këta nuk janë analistë, nuk janë as OJQ, këta janë vendimmarrës. Kurrgjë nuk bëjnë… këta veç rrinë dhe presin, kurrfarë veprimi nuk kanë marrë deri tash…”, ka thënë ai.