Analisti politik Imer Mushkolaj ka komentuar mundësinë që kandidati i propozuar, Bekim Sejdiu, të zgjidhet president i Kosovës, duke theksuar se sfida kryesore mbetet sigurimi i votave të nevojshme në Kuvend.
Mushkolaj tha se, sipas marrëveshjes së arritur mes Lumir Abdixhikut dhe Albin Kurtit, Sejdiu mund të jetë kandidat për president, por mbetet e paqartë nëse do të sigurohen votat e mjaftueshme.
“Zotëri Sejdiu mundet me u ba president, vetëm duhet me i pas votat. Ky është problem bazik”, tha Mushkolaj.
Ai vlerësoi se aktualisht mund të jenë rreth 62 deri në 63 vota të sigurta, ndërsa për zgjedhjen e presidentit nevojiten të paktën 80 vota në raundet përkatëse.
“Kanë arrit një farë marrëveshje, një farë pajtimi që zoti Abdixhiku e Kurti që z. Sejdiu të jetë kandidat, nëse e shohim te mundësitë. Na 62, maksimum 63. Nëse shohim qëndrimin në sallë të deputetëve të vet, do të mrrihej 80 i nevojshëm, në rastin më të mirë 81”, deklaroi ai.
Mushkolaj theksoi se situata bëhet edhe më e vështirë duke pasur parasysh qëndrimet e partive të tjera, përfshirë PDK-në dhe Aleancën.
“Duke pasur parasysh edhe deklarimet e partive të tjera, në këtë rast edhe PDK e Aleanca nuk do të votojnë për ndonjë kandidat të propozuar prej Vetëvendosjes”, tha Mushkolaj.