Drejtoresha e Arsimit në Komunën e Prishtinës, Besianë Musmurati, ka prezantuar projektin e ri për shkollat e Prishtinës, i cili quhet “Ora e Leximit”, projekt që do të zbatohet për klasët e para deri te e pesta.
Musmurati theksoi që Komuna e Prishtinës ka blerë libra të rinj, në vlerë prej mbi 100 mijë eurosh, dhe se ato do t’i shpërndajë në shkolla.
“Fëmijët do të lexojnë libra që atyre ju pëlqejnë. Do të lexojnë Utën e Maleve, Piter Panin, Princin e Vogël, Aventurat e Profesor Kantit, Qarlin që transformohet në T-Rex, Ditarin e Djaloshit Nerd, do të mësojnë për Musinë Kokalarin, Greta Thunberg, Nënë Terezën, e shumë e shumë figura të tjera” tha Musmurati.
Me zhvillimin e kësaj politike të re, që përfshin të gjitha shkollat e Prishtinës, synohet që të përmirësohet raporti i nxënësve me librin, e, rrjedhimisht, të rritet cilësia e arsimit në Prishtinë.
Kjo vjen si pasojë e rezultateve të dobëta në PISA, ku është vlerësuar se nxënësit e Kosovës nuk kanë njohuri të mjaftueshme për të lexuar dhe kuptuar një tekst.