Zëvendëskryetari i Preshevës, Ragmi Mustafa shprehet kritik për buxhetin e ndarë nga Kosova, duke thënë se dy milionë euro kanë mbetur pa u shpenzuar nga viti i kaluar për çka sipas tij, përgjegjës është ekzekutivi vendor.
Kryetari i Partisë Demokratike Shqiptare (PDSh) në intervistën për KosovaPress “mashtrim” e konsideron edhe ndarjen e mjeteve nga Shqipëria, të cilat i konsideron të pamjaftueshme.
Në Preshevë, Medvegjë e Bujanoc nuk janë zbatuar dy milionë eurot e ndara nga qeveria në vitin 2023, thotë Ragmi Mustafa.
Kritik shprehet edhe ndaj Shqipërisë, për çka i konsideron “mashtrim” mjetet e ndara së fundmi.
Zëvendëskryetari i Preshevës thekson se kjo komunë është në gjendje të rëndë ekonomike për shkak të qasjes diskriminuese të Serbisë.
Mustafa ka shprehur shqetësim edhe lidhur me gjendjen ekonomike të shqiptarëve të Luginës, duke përmendur faktin se 75 për qind e tyre janë të papunë.
Për shkak të papunësisë e mos njohjes së diplomave nga Kosova, shqiptarët e Luginës së Preshevës po migrojnë në masë të madhe. Ai thotë se duhet të merren masa për mbajtjen e shqiptarëve në vendbanimet e tyre.
I ashpër shprehet edhe me ish-kryetarin Shqiprim Arifi, pushtetin e të cilit e quan “sharlatan”.
Në qershor 2024, Presheva mbajti zgjedhje të parakohshme, duke qenë se për nëntë muaj nuk arriti të mblidhet asnjëherë kuvendi komunal. Kështu, u krijuan kushtet për shpërndarjen e kuvendit. Në krye të komunës është Ardita Sinani nga PVD-ja, ndërsa zëvendëskryetar Ragmi Mustafa nga PDSH-ja.