Afër një prej Shtatë Mrekullive të Botës së Lashtë – Piramidës së Madhe të Khufut, Egjipti ka hapur zyrtarisht Muzeun e Madh Egjiptian (GEM), që konsiderohet si muzeu më i madh arkeologjik në botë dhe një pikë referimi e rëndësishme kulturore e kohës moderne.
Muzeu, që mbulon rreth 100,000 artefakte dhe shtatë mijëvjeçarë të historisë egjiptiane nga periudha para-dinastike deri te epoka greke dhe romake, është projektuar për të tërhequr deri në 8 milion vizitorë në vit, duke i dhënë një nxitje të madhe turizmit egjiptian.
Atraksioni kryesor i muzeut është varri i plotë i mbretit të ri Tutankhamun, i ekspozuar për herë të parë që nga zbulimi i tij nga arkeologu britanik Howard Carter. Ekspozita përfshin maskën e famshme të arit të Tutankhamunit, fronin dhe karrocat e tij.
“Që nga zbulimi i varrit në vitin 1922, vetëm rreth 1,800 nga mbi 5,500 pjesë të varrit ishin ekspozuar. Idemë ime ishte që të ekspozohet varri në tërësinë e tij, asgjë të mos mbetet në depo ose në muze të tjerë, për të ofruar përvojën e plotë siç e pa Howard Carter mbi një shekull më parë,” thotë Dr. Tarek Tawfik, president i Shoqatës Ndërkombëtare të Egjiptologëve dhe ish-drejtor i GEM.
Kostoja e muzeut është rreth 1.2 miliardë dollarë dhe hapja e tij përkon me ekspozita të tjera madhështore, përfshirë anijen funerale të Khufu-t, 4,500-vjeçare, një nga anijet më të vjetra dhe më mirë të ruajtura të lashtësisë.
Muzeu mbulon një sipërfaqe prej 500,000 m², sa 70 fusha futbolli, me fasadë të mbuluar me hieroglife dhe alabaster të tejdukshëm të prerë në forma trekëndëshesh, dhe një hyrje në formë piramide. Nga brenda, vizitorët mund të shohin obelisken e Ramesses II, statujën e tij 11-metra të lartë dhe një shkallë gjigante e rrethuar me statuja të mbretërve dhe mbretëreshave të lashta.
Përveç vlerës historike dhe turistike, muzeu është gjithashtu një qendër kërkimore dhe restaurimi. Artefakte të Tutankhamunit, përfshirë armët dhe pajisjet e tij prej tekstili dhe lëkure, janë restauruar nga konservatorë egjiptianë, sipas ligjit egjiptian që restaurimet të kryhen vetëm nga ekspertë vendas.
Hapja e GEM është shoqëruar edhe me një kërkesë për rikthimin e artefakteve të mëdha egjiptiane të mbajtura jashtë vendit, përfshirë Gurin e Rosetës në British Museum, Zodiakun e Dendera-s në Louvre dhe bustin e Nefertit në Berlin. Zahi Hawass dhe egjiptologë të tjerë kanë kërkuar rikthimin e këtyre objekteve, duke argumentuar se ato janë marrë në mënyrë kolonialiste.
Dr. Hawass thekson: “Ne duam që këto tre objekte të kthehen si dhuratë nga këto vende, siç Egjipti i ka dhuruar botës shumë thesarë kulturorë.”
Muzeu i Madh Egjiptian nuk është vetëm një ekspozitë historike, por edhe një simbol i krenarisë kombëtare, që tregon aftësinë e egjiptianëve në ruajtjen e trashëgimisë dhe kurimin e muzeve./BBC