Ministrja e Arsimit, Arbërie Nagavci, ka thënë se kanë pranuar ftesën e Avokatit të Popullit, Naim Qelajt, dhe Qeveria është e gatshme që të dialogojë me Këshillin Grevist vetëm që të fillojë procesi mësimor.

Më tej, ajo ka treguar se është takuar të shtunën e 17 shtatorit me Avokatin e Popullit, Naim Qelaj, në këtë takim kishte qenë së bashku me zëvendëskryeministrin, Besnik Bislimi dhe ministrin e Financave, Punës dhe Transfereve, Hekuran Murati.

“Kemi shprehur gatishmërinë tonë për të vazhduar dialogun dhe fillimin e procesit mësimor”.

“Ndërkohë, sot kemi pranuar një letër nga Avokati i Popullit, Naim Qelaj, të cilën e kemi shqyrtuar dhe menjëherë i kemi kthyer përgjigje duke adresuar propozimet e tij.

“Si Qeveri kemi pritur që të ketë gatishmëri edhe nga SBASHK-u dhe të vazhdojmë dialogun social e të fillojë mësimi. Por, përmes mediave kemi parë tashmë që Sindikata ka dalë me qëndrim se greva vazhdon”, ka theksuar ajo.

Sipas Nagavcit, SBASHK-u nuk e dëshiron bashkëpunim me Qeverinë Kurti 2, sepse ata kanë “refuzuar edhe rolin ndërmjetësues të presidentes e tash së fundi edhe të Avokatit të Popullit”.

“SBASHKU tanimë po e dëshmon se grevën nga një instrument e ka shndërruar në objektiv në vete, si e tillë, greva e ka humbur çdo kuptim”, ka theksuar ajo.

Nagavci ka përfunduar duke thënë se i fton mësimdhënësit anembanë Kosovës që nga nesër t’u kthehen shkollave.

Avokati i Popullit thirrje qeverisë dhe grevistëve: Një zgjidhje për t’iu mundësuar fëmijëve të drejtën për arsimim