Sot, Policia e Kosovës ka konfirmuar se janë arrestuar dy persona të dyshuar në lidhje me vrasjen e Liridona Murselit.
“Pas përfundimit të ekzaminimit të vendit të ngjarjes, janë ndërmarrë veprime intensive hetimore, të cilat kanë rezultuar në arrestimin e dy personave të dyshuar lidhur me rastin e sipërshënuar”, thuhet në njoftimin e policisë.
Ndërsa, njëri nga të dyshuarit që u arrestua është edhe Naim Murseli, bashkëshorti i gruas së vrarë.
Naim Murseli ka pranuar fajësinë mbi akuzat të cilat rëndojnë mbi të, duke pranuar se ka porositur vrasjen e gruas së tij.
Kjo ndodhi pasi Granit Plava kishte pranuar veprën penale të vrasjes së Liridona Murselit, për të cilën, kishte thënë se është paguar nga Naim Murseli.
Ndërsa, është sekuestruar edhe arma me të cilën dyshohet se është kryer krimi.
Rasti po hetohet si vrasje me armë zjarri.
Fillimisht, ishte thënë se vrasja ka ndodhur pas një rasti që kishte të bënte me plaçkitje.
Një shumë prej 30 mijë eurosh dyshohet se është çmimi që kushtoi për vrasjen e Liridona Murselit, gruas së Naim Murselit.
Ndryshe, më 30 nëntor, Liridona Murseli mbeti e vrarë pasi ajo bashkë me burrin e saj dhe fëmijët u bënë cak i një grabitjeje.
Vrasja u krye me armë zjarri, përderisa autorët u larguan nga vendi i krimit me shpejtësi.