Kampioni i Italisë, Napoli, e ka fituar derbin e Italisë ndaj Juventusit, duke triumfuar me rezultat 2:1 në kuadër të xhiros së 14-të të Serie A.
Dy golat e fitores për Napolin i realizoi sulmuesi danez, Rasmus Hojlund, i cili shënoi në minutën e 7-të për epërsinë 1:0 dhe më pas në minutën e 78-të për rezultatin përfundimtar 2:1.
Golin e vetëm për Juventusin e shënoi turku Kenan Yildiz. Sulmuesi i krahut, Edon Zhegrova, u aktivizua në minutën e 82-të, duke u përpjekur për të ndryshuar fatin e ndeshjes, por pa arritur të shpëtojë skuadrën e tij nga humbja.
Te Napoli, kapiteni i Kosovës, Amir Rrahmani, luajti deri në fund të ndeshjes, duke ndihmuar skuadrën e tij të ruajë avantazhin.
Me këtë fitore, Napoli ngjitet në krye të tabelës me 31 pikë, duke kaluar Interin, që ndodhet në vendin e dytë me 30 pikë, ndërsa Milani renditet i treti me 28 pikë.