Në mbledhjen e Qeverisë së Kosovës, këtë të mërkurë, janë ndarë 520 mijë euro për renovimin e objektit të Institutit të Mjekësisë Ligjore (IML).
Lexo më shumë: Qeveria ndan 520 mijë euro për renovim të objektit të IML-së
Ministria e Drejtësisë ka njoftuar se ky buxhet do të shfrytëzohet për renovimin e hapësirave të IML-së që ishin dëmtuar si pasojë e incidentit me zjarrin në nëntor të vitit të kaluar, mirëpo në të njëjtën kohë do të intervenohet në tërë objektin e IML-së, duke rritur sigurinë e përgjithshme me qëllim të parandalimit të incidenteve të tilla në të ardhmen.
“Renovimi do të realizohet në bazë të projektit të përgatitur nga departamenti i inxhinieringut në MD, i cili përfshin rekomandimet e dhëna nga Komisioni i Universitetit të Prishtinës për vlerësimin e dëmeve dhe rritjen e sigurisë së objektit”, thuhet në njoftim.
Sipas njoftimit të MD-së, pikat kryesore në të cilat do të investohet do të jenë instalimi i sistemit kundër zjarrit, instalimi i sistemit të ri elektrik, vendosja e ventilimit qendror, përmirësimi i kushteve dhe funksionalizimi i sallave të autopsisë, si dhe ridizajnimi i hapësirave të brendshme të punës në përputhje me standardet dhe praktikat më të mira ndërkombëtare.
“Me këtë investim, do të krijohet një mjedis i sigurt për punë dhe ruajtjen e provave të rëndësishme mjeko-ligjore që do të mundësojnë rifillimin sa më shpejt të procesit të akreditimit të shërbimeve mjeko- ligjore”, thuhet tutje në njoftim.