Ka ndërruar jetë në moshën 89-vjeçare një nga figurat më emblematike të ekranit italian, Pippo Baudo.
Një emër i padiskutueshëm i televizionit, ai mbetet i paharruar për karrierën e tij të gjatë si prezantues dhe për rekordin në Festivalin e Sanremos, të cilin e drejtoi plot 13 herë.
Baudo u bë i njohur jo vetëm për stilin e tij të veçantë në prezantim, por edhe për aftësinë e rrallë për të zbuluar dhe promovuar talente të reja, duke lënë gjurmë të thella në historinë e spektaklit italian.
Për dekada me radhë, ai ishte një prani e pandarë në jetën televizive të italianëve, duke fituar respektin dhe dashurinë e publikut.
Zëri dhe stili i tij i veçantë në drejtimin e spektakleve muzikore dhe televizive, për shumë shqiptarë — sidomos para viteve ’90 — përbënin një dritare të jashtëzakonshme komunikimi me kulturën dhe muzikën italiane e botërore, përmes transmetimeve të RAI-t.