Një burrë dhe një grua me pasaporta ruse janë ndaluar në Jarinje, pasi dyshohet se kanë kaluar nga rrugët ilegale.
Në njoftimin e Policisë së Kosovës thuhet se ata u ndaluan mbrëmjen e së dielës.
Siç thuhet në raportin 24-orësh të policisë, pas verifikimit të personave, të njëjtit nuk kishin viza të Republikës së Kosovës.
Sipas policisë, ata kanë ardhur nga Nishi i Serbisë.
“SPK Jarinje 05.05.2024-20:10. Raportohet se në dalje në SPK Jarinje janë hasur dy persona me pasaporta ruse (një mashkull dhe një femer) të cilët nuk kishin viza të Republikës së Kosovës. Pas verifikimit të personave, të njejtit nuk kishin hyrje/dalje në Republikën e Kosovës. Sipas tyre, të njëjtit kanë ardhe nga Nishi i Serbisë dhe kanë përfunduar në SPK Jarinje, dyshohet se kanë ardhur rrugëve ilegale”, thuhet në njoftimin e policisë.
Me vendim të prokurorit, dy të dyshuarit janë dërguar në mbajtje.