Deputeti i Lidhjes Demokratike të Kosovës (LDK), Armend Zemaj, ka njoftuar se e kanë pranuar raportin e Komisionit për Buxhet e Financa mbi projektligjin për ndarjet buxhetore për vitin 2024.
Zemaj ka thënë se kishte propozuar katër amendamente për disa projekte, që, sipas tij, janë domosdoshmëri për qytetarët që jetojnë në ato vende.
Deputeti i LDK-së ka thënë se njëri amendament ishte për ujë të pijes, tjertri për turizëm zhvillimor, sport dhe trashëgimi humane dhe të kujtesës së luftës për liri.
“Kjo qasje e keqe e pushtetit dhe trajtimi subjektiv i buxhetit të popullit është e dëmshme dhe refuzuese. Është tepër keq kur një pushtet i privon taksapaguesit nga të mirat që u takojnë”, ka shkruar Zemaj nga LDK-ja.
Mes të tjerash, ai ka pohuar se do të vazhdojë betejën që të kërkojë përkrahjen e deputetëve të Kuvendit për këto amendamente.
“Besoj që deputetët e shumicës nuk janë vetëm instrument vote, por kanë edhe dinjitet të tyre”, ka thënë tutje ai.
Nga Lidhja Demokratike e Kosovës (LDK) ka reaguar dhe nënkryetari i Prishtinës, Alban Zogaj.
Zogaj ka thënë se kryeqyteti duhet të ketë trajtim special, por, sipas tij, me Qeverinë aktuale Prishtina “po bllokohet”.
“Projektet e Prishtinës nuk mund të konsiderohen si projekte lokale, ato janë projekte kombëtare! Andaj, Kryeqyteti duhet të ketë trajtim special. Me këtë Qeveri, po ndodh’ e kundërta, Kryeqyteti po bllokohet!”, ka shkruar Zogaj.