“Termokos” SH.A., ndërmarrja publike më e madhe e Kosovës për ngrohje qendrore, mori pjesë në Kongresin “EuroHeat and Power” në Torino.
Në këtë takim, u diskutuan zhvillimet e fundit në fushën e ngrohjeve qendrore, integrimit të burimeve të energjisë së pastër dhe agjendën e gjelbër.
NP “Termokos” prezantoi planet e zgjerimit të rrjetit të ngrohjes, projektet e ardhshme për energji diellore dhe faturim të digjitalizuar.
“Në këtë takim të mbajtur në Torino, ku morën pjesë mbi 400 delegatë nga 32 shtete në mbarë botën, u diskutuan zhvillimet e fundit në fushën e ngrohjeve qendrore, agjendës së gjelbër, integrimit të ngrohjes me burime të ripërtërishme të energjisë së pastër. Kongresi mbajti edhe Kuvendin e rregullt, të parin që nga takimi i fundit më 2019”, thuhet në njoftimin e Termokosit.
Kryeshefi ekzekutiv i NP “Termokos”, z.Fisnik Osmani pati takime të veçanta, ku ka prezantuar planet e ndërmarrjes për zgjerimimin e rrjetit të ngrohjes, kogjenerimin, investimin e ardhshëm “Solar 4 Kosovo”, si dhe projektin “Prishtina Heatsave” për faturim të digjitalizuar.
Po ashtu, në takimin me Aurelie Beauvais, drejtoreshën e “EuroHeat and Poëer”, u diskutua për thellimin e bashkëpunimit në promovimin e NP “Termokos” për investime dhe donatorë.
“’Euroheat and Power’ është organizatë evropiane me seli në Bruksel, që ndihmon shtetet në promovimin e ngrohjes qendrore, ofron ndihmë në çështjet rregullative evropiane për shtetet anëtare, si dhe ofron platformën më të madhe të bashkëpunimit në Evropë në mes investitorëve, donatorëve, Komisionit Evropian, akterëve publikë, agjencioneve rregullative, ndërmarrjeve shtetërore si dhe sektorit privat”, thuhet në njoftim.
Kryeshefi Osmani me këtë rast deklaroi se “Termokos” ka dyfishuar kapacitetet në vitet e fundit, duke ofruar shërbime kualitative për më shumë konsumatorë edhe për lagje të tjera prishtinase. Mbi 200 milionë euro investime janë planifikuar për NP “Termokos” në vitet e ardhshme, duke shndërruar këtë ndërmarrje në fokus të zhvillimit ekonomik të kryeqytetit.
Kryeshefi Osmani pati takime të ndara edhe me udhëheqësit e Bankës Zhvillimore për Rindërtim dhe Zhvillim (BERZH), organizata simotra nga Gjermania, Suedia, Estonia e kështu me radhë.