Rusia, të martën ka ndërprerë furnizimin me gaz për Holandë, në përshkallëzimin e fundit të mosmarrëveshjes për pagesat e energjisë me perëndimin.
Kompania holandeze Gasterra ka raportuar se Gazprom ka vendosur ta ndalojë furnizimin me gaz për shkak të refuzimit të kompanisë për të paguar në valutën ruse, rubla.
Gazprom Export ka kërkuar që vendet evropiane të paguajnë për furnizimet me gazin rus në rubla, për shkak të sanksioneve të vendosura ndaj Rusisë për pushtimin e Ukrainës.
Gazprom tashmë kishte ndërprerë gazin për Finlandën, Poloninë dhe Bullgarinë pasi ato refuzuan të respektonin kushtet e reja të pagesës, shkruan REL.
GasTerra, e cila blen dhe tregton gaz në emër të qeverisë holandeze, ka thënë në një deklaratë se kishte “parashikuar” lëvizjet e Rusisë për të ndërprerë gazin, dhe se ka blerë dy miliardë metra kub gaz që pritej ta merrte nga Gazprom deri në tetor.
Sipas shifrave të qeverisë, rreth 44 për qind e përdorimit të energjisë holandeze bazohet në gaz, por vetëm rreth 15 për qind e gazit holandez vjen nga Rusia.
Qeveria holandeze ka njoftuar më herët planet e vendit për ta ndaluar përdorimin e karburanteve fosile ruse deri në fund të vitit.
Vendet evropiane janë të ndara se si t’i përgjigjen kërkesës së Moskës që të gjitha pagesat për gazin të bëhen në monedhën vendase.
Gjermania dhe Italia thuhet se u kanë thënë kompanive të tyre se mund të hapin llogari në rubla për të vazhduar blerjen e gazit rus pa shkelur sanksionet.
Ndërkaq, udhëheqësit e Bashkimit Evropian janë pajtuar për të bllokuar më shumë se dy të tretat e importeve të naftës ruse. Ky ndalim do të prekë vetëm naftën që arrin nga deti, por jo naftën e tubacionit, pas kundërshtimit nga Hungaria.
BE bie dakord për një marrëveshje kompromisi për ndalimin e importeve të naftës ruse