Anija e ngarkuar me ndihma humanitare nga Kosova që u nis të shtunën nga porti i Mersinit në Turqi ka mbërritur në Gaza.
Ministrja në detyrë e Punëve të Jashtme dhe Diasporës, Donika Gërvalla, ka bërë të ditur se me të mbërritur në Gaza, ndihmat kanë filluar menjëherë të shpërndahen, njofton Dukagjini.
“Dje pasdite morëm konfirmimin se ndihma humanitare e ndarë nga Qeveria e Republikës së Kosovës, e dedikuar për popullin e Gazës ka mbërritur në Gaza dhe menjëherë ka nisur shpërndarja për familjet në nevojë, përmes partnerëve humanitarë në terren”, ka shkruar Gërvalla.
Gërvalla, mes tjerash, ka uruar që kjo ndihmë modeste t’u jap sadopak mbështetje e lehtësim familjeve atje.
“E dimë që asgjë nuk e zëvendëson humbjen dhe dhimbjen atje. Por shpresojmë që kjo ndihmë modeste t’u japë sadopak mbështetje e lehtësim familjeve, sidomos fëmijëve dhe të moshuarve, në ditë kur edhe gjërat më bazike mungojnë. Shpreh mirënjohjen time të sinqertë për Republikën e Turqisë dhe Gjysmëhënën e Kuqe Turke për bashkëpunimin dhe mbështetjen që e bënë të mundur këtë operacion humanitar”, ka shkruar Gërvalla.
Kujtojmë se dërgesa humanitare në vlerë prej 500 mijë eurove, përfshin tenda, pako ushqimore, batanije dhe 158 mijë racione të ushqimit të ngrohtë për banorët në nevojë atje.
Ndihmat humanitare nga Kosova për Gazën nisen me anije nga Turqia