Të enjten e nëntë qershorit, janë bërë 4 vite nga vdekja e ish-kryetarit të Federatës së futbollit të Kosovës, Fadil Vokrri. Mëngjesi i 9 qershorit 2018 ishte tronditës për Kosovën, pas lajmit se Vokrri kishte ndërruar jetë. Tërë jetën, Vokrri ia kushtoi futbollit.
Kryetari i FFK-së, Agim Ademi ka bërë sot homazhe dhe ka vendosur buqeta lulesh tek varri i ish-presidentit të FFK-së, Fadil Vokrri, me rastin e katër vjetorit të vdekjes së tij.
Pas homazheve presidenti Ademi në një prononcim për media ka thënë se kujtimi për Legjendën e futbollit mbarëkombëtar do të jetë i përhershëm.
“Sot është përvjetori i katërt pa Legjendën tonë. Fadil Vokrri dihet tashmë kush ka qenë në fushën e lojës, normalisht ka qenë edhe udhëheqës i Federatës dhe i falënderoj të gjitha ata që kanë dhënë kontribut për futbollin dhe për FFK-në që me ardh në këtë ditë.”
Kombëtarja e Kosovës do të luaj sonte ndaj Irlandës së Veriut në stadiumin, “Fadil Vokrri”, në ditën kur ka ndërruar jetë legjenda e futbollit kosovar.
PortaliD mëson se FFK-ja në krye me Agim Ademin, nuk e ka ftuar familjen Vokrri në stadiumin që mbanë emrin e legjendës së futbollit kosovar, tashmë të ndjerë Fadil Vokrri.
Familjes së Vokrrit, bashkëshortes, Editës dhe djemve, Gramozit e Albertit, tash e një kohë, Federata e Futbollit e Kosovës nuk iu dërgon ftesa për të shikuar në stadiumin, “Fadil Vokrri”, ndeshjet e Kombëtares së Kosovës.
Nën drejtimin e Fadil Vokrrit, Kosova ishte pranuar në UEFA dhe në FIFA dhe kishte filluar ndërtimi i Kombëtares së Kosovës, të cilën e gëzojmë sot.