Në një mesazh për festën e Fitër Bajramit, myftiu i Kosovës, Naim Tërnava ka theksuar rëndësinë e festimit të kësaj dite për të forcuar lidhjet familjare dhe për të kultivuar një shoqëri të lumtur e të ndërgjegjshme.
Në një adresim për media, në ditën e fundit të muajit të Ramazanit, Tërnava ka thënë se duhet bërë më shumë që këto festa të mos zbehen, por të festohen në mënyrën më të mirë.
Ai ka thënë se këtë festë, e cila vjen pas muajit të shenjtë të Ramazanit, besimtarët do të jenë më afër njëri-tjetrit.
“Nesër është ditë e Bajramit, ditë festë për besimtarët islam në mbarë botën, të gjithë besimtarët i gëzohen kësaj feste ngase vjen pas një sakrifice të madhe, pas agjërimit të muajit të bekuar të Ramazanit. Edhe ne Kosovë i gëzohemi kësaj feste kaq madhështore e cila shfaqet në familjet tona me gëzim e hare e gjuhë falënderuese ndaj krijuesit. Sot në këtë ditë të fundit të bekuar të Ramazanit në emër të BIK-ut, të institucioneve të saj të ju uroj për këtë festë kaq madhështore, festën e të Fitër Bajramit”, ka thënë ai.
Tërnava ka theksuar se është një mundësi për të mbajtur dhe për të forcuar më tej lidhjet familjare dhe për të promovuar vlerat e një shoqërie të lumtur.
“Është një mundësi për të mbajtur dhe forcuar më shumë lidhjet familjare. Ndaj duhet bërë edhe më shumë që këto festa t’i festojmë siç është më së miri e të mos zbehen. Festa e Fitër Bajramit ka për qëllim formimin e një shoqërie të lumtur e të ndërgjegjshme”, ka thënë Tërnava.
Myftiu gjithashtu ka shtuar se Fitër Bajrami përfaqëson vlerat e thella shoqërore dhe njerëzore të Islamit, duke theksuar unitetin, dashurinë, dhe respektin ndërmjet besimtarëve.
BIK-u tregon kohën se kur falet Namazi i Fitër Bajramit
Bashkësia Islame e Kosovës (BIK), ka njoftuar të gjithë besimtarët myslimanë se dita e parë e Fitër Bajramit është të mërkurën më 10 prill, dhe namazi falet në orën 06:41.