Ministria e Arsimit, Shkencës, Teknologjisë dhe Inovacionit (MAShTI) ka njoftuar hapjen e platformës për aplikim për subvencionimin e teksteve shkollore dhe të materialeve mësimore.
Siç thuhet në njoftim, prindërit dhe kujdestarët e nxënësve tani mund të aplikojnë për subvencionet përmes platformës E-Kosova, duke ndjekur linkun e dedikuar: E-Kosova.
Sipas njoftimit të MAShTI-t, për nxënësit e shkollave fillore nga klasa e 1 deri në klasën e 5-të do të ndahen nga 80 euro për çdo nxënës, ndërsa për nxënësit e arsimit në nivelin e mesëm të ulët, nga klasa e 6-të deri në klasën e 9-të, do të ndahen nga 110 euro.
“MAShTI do ta përcjell procesin e aplikimit me shumë vëmendje dhe do të adresoj secilën sfidë që paraqitet, si në aspekt teknik e po ashtu edhe përmbajtësor”, thuhet në njoftim.
E ky vendim i MASHTI-t është kritikuar nga paritë opozitare dhe nga shoqëria civile.
PDK-ja e LDK-ja e kanë kritikuar ministren, Arbërie Nagavci, për paaftësinë e saj në përmbushjen e obligimit ligjor për sigurimin e librave për nxënësit.
- PDK-ja kritikon MAShTI-in për subvencionimin e teksteve shkollore: Edhe vonë edhe shtrenjtë
- Edhe LDK-ja kritikon MAShTI-n: Për herë të dytë, dështoi t’i sigurojë tekstet shkollore për nxënësit
Ndërkaq, sipas Nismës CorrWatch, MASHTI ka shkelur për herë të dytë detyrimet ligjore duke kaluar përgjegjësinë e furnizimit me tekste shkollore nga Ministria te prindërit përmes subvencioneve – ku paratë iu transferohen prindërve, në mënyrë që ata t’i blejnë pastaj tekstet shkollore për fëmijët e tyre.
Gjatë ditës në mbeldhjen e Qeverisë, është marrë vendim që të ndahen 7,375,138.00 euro për subvencionimin e blerjes së teksteve dhe materialeve mësimore për vitin shkollor 2024/2025.