Në mungesë të kuorumit, për herë të dytë ka dështuar votimi i propozim-rezolutës për mbështetjen urgjente financiare të Policisë së Kosovës.
E njëjta ishte propozuar nga Grupi Parlamentar i Partisë Demokratike të Kosovës.
Nënkryetarja e Kuvendit të Kosovës, Saranda Bogujevci, bëri të ditur se në sallë ishin të pranishëm vetëm 28 deputetë, dhe se kjo pikë do të vendoset në seancën e radhës, e cila tha se pritet të fillojë pas 10 minutash.
“Vetëm 28 deputetë janë të pranishëm, kështu që kjo pikë mbetet për t’u votuar në seancat e radhës, i kthehet kryesisë dhe vendoset brenda kryesisë në cilën seancë vendoset Rezoluta”, tha nën-kryetarja e Kuvendit të Kosovës, Saranda Bogujevci.
Deputetët e mazhorancës sërish e kanë bojkotuar seancën e jashtëzakonshme në Kuvendin e Kosovës, ku pritet të diskutohet shqyrtimi i Propozim-Rezolutës për mbështetjen urgjente financiare të Policisë së Kosovës.
Grupi parlamentar i Lëvizjes Vetëvendosje, përmes një konference për media, kishte njoftuar se nuk do të merrte pjesë në seancë.