Eshtrat e babait i janë varrosur dy vite më parë ndonëse e dinte qysh nga viti 1999 se ka vdekur.
Këtë lajm, Shaban Deliut ia kishte treguar një i mbijetuar nga Masakra e Rezallës në të cilën ishin ekzekutuar 98 banorë.
Në mesin e trupave të gjetur, Deliu babanë e kishte identifikuar përmes një elementi që e dinin vetëm familja e ngushtë.
“Ky u kanë i aksidentum, e ka pas një shipkë të hekrit në këtë pjesën kockore për me vërtetu që janë eshtrat e babës, neve na ka interesu ajo pjesë. Kur i kemi pa eshtrat në IML, ajo pjesë ka qenë mesin e shumë eshtrave të tjera të gjetura. Tash shpirti jem është shumë më i qetë”, ka thënë Deliu.
Por njësoj nuk ndihet Havë Deliu e cila babanë e ka ende të zhdukur.
“Më mungon shumë, më mungojnë eshtrat që dua të pushojnë në varrin e tij që të jem më e qetë. Unë jam në shtëpi ose tu ba diçka edhe them se sa vite kaluan e mu më mungon babai im, ku i ka eshtrat”, ka thënë Havë Deliu.
Havë Deliu ka të vrarë edhe djalin e vëllait, xhaxhain e shumë bashkëmoshatar.
Ndër familjet më të përmendura në pllakat përkujtimore është edhe familja Ahmetaj.
Pasardhësi i tyre, Behar Ahmetaj ka mbi 13 vjet që është pjesë e ushtrisë së Kosovës. Vendimin thotë se e morri nga ndodhitë e fshatit.
“Axha u vra në mallet e fshatit, 20 vjeç. Ndërsa gjyshine kemi gjet mas lufte në një bunar këtu në fshat. Njëra prej arsyeve kryesore është kjo për të cilën jemi sot këtu për të rënët, unë kam vendos me i shërby vendit duke qenë ushtar i Kosovës”, ka thënë Ahmetaj.
Një pjesë e trupave të të zhdukurve u gjenden në Rudnicë të Rashkës dhe iu dorëzuan familjarëve.
Nga kjo masakër, vetëm tre persona kanë shpëtuar të gjallë.