654 milionë euro do t’u ndahen komunave përgjatë vitit 2023 nga Ministria e Financave, Punës dhe Transfereve (MFPT), ka bërë të ditur Ministri Murati.
Përmes një postimi në Facebook, Ministri i Financave, Hekuran Murati ka thënë se buxheti që do t’u ndahet komunave këtë vit është 15 për qind më i lartë sesa buxheti i vitit 2022.
“Kjo është rritja më e madhe vjetore që ka ndodhur ndonjëherë, dhe vjen falë përformancës së mirë në rritjen e të hyrave në buxhetin e shtetit”, ka shkruar Murati.
Ndër të tjera, ai i ka cilësuar sikurse “shpifje” pretendimet e ekzistencës së bllokimit të buxheteve komunale.
“Vetëm dikush që nuk merr vesh fare në procesin buxhetor, mund të pretendojë se qarkoret për vitin 2023 po bllokojnë investimet në vitin 2022”, ka shkruar Murati në Facebook.
Murati ka thënë se me rritjen e buxhetit, komunat do të kenë mundësinë të ofrojnë më shumë shërbime për qytetarët.
