Zveçani vazhdon të mbetet vend jo-miqësor për Policinë e Kosovës.
Sulme ndaj forcave të rendit janë raportuar edhe ketë të hënë.
Rreth orës 14:00 një veturë e Policisë është bllokuar nga turma e protestuesve, e më pas është sulmuar me mjete të forta.
Deri tek kjo situatë dyshohet se erdhi pasi patrolla e Policisë kishte ngatërruar rrugën.
“Si pasojë e sulmit me mjete të forta (gurë), veturës i është thyer xhami, e cila më pas është larguar nga ai lokacion. Nuk raportohet për të lënduar, përderisa rasti është duke u hetuar.”, thotë njoftimi i policisë.
Situatë ndryshe mbizotëron në Zubin Potok, komuna me situatën më të qetë nga fillimi i protestave.
Megjithatë, ushtarët e KFOR-it, rrijnë në gjendje gatishmërie pas objektit të komunës, sikur bëjnë edhe njësitet speciale të Policisë së Kosovës.
Por jo në vendet ku ishin vendosur para më 26 maj.
Edhe ushtarët e KFOR-it janë më pak të pranishëm në terren, derisa më parë ishin dhjetëra e tash shumë më pak.
Numri i protestusve ka rënë, si zakonisht paradite shumica janë gra e vajza, pjesa dërmuese pjesë e institucioneve publike.
Pos Policisë, KFOR-it dhe gazetarëve në komunë vazhdon të qëndrojë simboli pak i pëlqyer nga protestuesit, flamuri shtetëror i Kosovës.
Megjithatë ka ditë që kryetari Izmir Zeqiri, punën po e vazhdon nga fshati Çabër e jo në zyrën që i takon, sikur ka bërë edhe kryetari i Zveçanit, Lulzim Peci.
Ndryshe prej tyre kryetarët që i përkasin Lëvizjes Vetëvendosje janë në objektet komunale.
Erden Atiqi në Mitrovicë të Veriut e Lulzim Hetemi në Leposaviq.
Ky i fundit më datë 29 maj para orës 7-të në mëngjes është parë në objekt të komunës, ndërsa përveç vizitave që i janë bërë brenda, ai nuk është raportuar të ketë dalur jashtë objektit.
Në këtë komunë gjatë ditës nuk është raportuar për ndonjë incident.